“ Kaj ntug tag kis ntxov txiv leej tub yuav sua roj sua hneev mus kawm txuj kawm ci nyob rau ntug kev deb, niam leej ntxhais nim yuav xa txiv leej tub txog tej niag kaum zej kaum zos yuav hais seev yees tias txiv leej tub koj mus kawm txuj kawm ci yuav tso tau niam leej ntxhais nyob rau ntuj tom qab, yog koj mus pom niam nas miv noog saub los koj txhob nrog niam nas miv noog saub- pom niam nas miv noog seev los koj txhob nrog niam nas miv noog seev nyob rau tej niag yas kev tsam niam leej ntxhais li kuv no yuav poob mus ua luag pej kum sev. koj mus pom niam nas miv noog saub los koj txhob nrog niam nas miv noog saub- pom niam nas miv noog seev los koj txhob nrog niam nas miv noog seev nyob rau tej niag yas kab tsam niam leej ntxhais li kuv no yuav poob mus ua luag pej kum nyab.”

===========================================

Nkauj hnub nyob kev deb txiv nraug hli nyob kev ncua ntev niam leej ntxhais lub ncauj lam tias hlub ntshe lub siab twb hais tias ntxub lam dag kom txiv leej tub zoo siab ua lub neej tiv ntuj tshav mus tiv ntuj kub. Nkauj hnub nyob kev deb txiv nraug hli nyob kev ncua dav niam leej ntxhais lub ncauj lam tias hlub tshaj ntshe lub siab twb hais tias ntxub tshaj lam dag kom txiv leej tub zoo siab ua lub neej tiv ntuj kub nyob rau ntuj kaj.

===========================================

Noog pej vuam nim yuav quaj nyob rau caij ntuj qhua li yuav nrhiav tau noog pej vuam tus txij nkawm nyob nruab tsuag, txiv leej tub ces nim xav xav hais lo lus tias hlub niam leej ntxhais li koj los ib leeg los twb hov ntshai rwg tsam niam leej ntxhais li koj twb tsis ntseeg thiab tsis yuav ces yuav ua rau txiv leej tub no txaj lub ntsej lub muag tsis muaj chaw npuab. Noog pej vuam nim yuav quaj nyob rau caij ntuj qhua li yuav nrhiav tau noog pej vuam tus txij nkawm nyob nruab zoov, txiv leej tub ces nim xav xav hais lo lus tias hlub niam leej ntxhais li koj los ib tug los twb hov ntshai rwg tsam niam leej ntxhais li koj twb tsis hu thiab tsis yuav ces yuav ua rau txiv leej tub no poob lub koob los lub moo tsis muaj chaw roos.

===========================================

Ntoo vaj khaum nim yuav txawm nyob zoov laus hlav me cag mos nyoos tua mus ntsia rau hauv av loj hlob yam tsis muaj hnub tuag, yog muaj txoj hmoo txiv leej tub tau niam leej ntxhais li koj los ua ib cuab yuav sau siab los hlub me niam leej ntxhais li koj ib leeg los ib tug mus kom txog hnub tuag yuav tsis pub koj nyob mus ntshaw luag. Ntoo vaj khaum nim yuav txawm nyob zoov laus hlav me cag mos nyoos tua mus ntsia rau hauv av loj hlob yam tsis muaj hnub vau, yog muaj txoj hmoo txiv leej tub tau niam leej ntxhais li koj los ua ib cuab los ib ntsau yuav sau siab los hlub me niam leej ntxhais li koj ib leeg los ib tug mus kom txog hnub laus yuav tsis pub koj nyob mus ntshaw luag sab nrauv.

===========================================

Mi Ntses yuav nyob nrog Niam Dej ib txhis tsis muaj hnub plam, niam leej ntxhais li koj muaj siab li sib tiag no ces mam cia txiv leej tub Nplooj siab ib txhis rau niam leej ntxhais ib tug ua tus Kav. Mi Ntses yuav nyob nrog Niam Dej ib txhis tsis muaj hnub hloov, niam leej ntxhais li koj muaj siab li sib tiag no ces mam cia txiv leej tub Nplooj siab ib txhis rau niam leej ntxhais ib tug ua tus Roos.

===========================================

Lub Ntuj nim yuav txawj roos lub teb nim yuav txawj tig muaj ib hnub twg tig tau niam leej ntxhais los ua txiv leej tub Sev, yuav sau siab hlo nrog niam leej ntxhais tsim kho lub neej seb puas yuav muaj hnub niam leej ntxhasi thiab txiv leej tub tau lub neej zoo nyob mus nto npe. Lub Ntuj nim yuav txawj roos lub teb nim yuav txawj tig muaj ib hnub twg tig tau niam leej ntxhais los ua txiv leej tub Cuab, yuav sau siab hlo nrog niam leej ntxhais tsim kho lub neej seb puas yuav muaj hnub niam leej ntxhasi thiab txiv leej tub tau lub neej zoo nyob mus muaj meej xws li luag.

===========================================

Mi kab Nqos vias txawm nyob teb txias yuav quaj kho siab zim rau tej niag kaum hav, twb yuav tav tau lub caij mus faus teb ua qoob ua loo tos noob neej noob tsav. Mi kab Nqos vias txawm nyob teb txias yuav quaj kho siab zim rau tej niag npoo roob, twb yuav tav tau lub caij mus faus teb ua qoob ua loo tos noob neej kwv tij hmoob.

===========================================

Zaub paj nim yuav txawm nyob nruab av qhuav loj hlob tsis cuag luag, txiv leej tub ua neej txom nyem nyob rau teb chaws Los tsuas ntshe niam leej ntxhais li koj twb yuav tsis tshua. Zaub paj nim yuav txawm nyob nruab av tawv loj hlob twb tsis cuag lawv, txiv leej tub ua neej txom nyem nyob rau Los tsuas teb chaws ntshe niam leej ntxhais li koj twb yuav tsis ntshaw.

===========================================